HOW TO PREPARE FOR YA EXAMS

Exam scores be one of de main requirements for you to gain admission and get scholarship for any skool. You must spend plenty time to study for ya exams. One place to find materials to study be for internet. You go find study material for de website wey I write for each of de exam. And dem get oda plenty materials wey you fit find for different sites.

And you also fit find books and CDs for good book stores for ya area. Go around, ask ya friends and you go find books too. Ee beta make you find de latest edition of any book. Dis na because de exams dey constantly change every year. So you suppose study with de latest materials so dat you no go dey study wetin you no need.

And now with de access Naija get to AMAZON online book store, you fit buy de latest books wey you need. Under no circumstance wey you go write any of dis exam without serious study. If you no study and go write any exam, na just waste of time be dat. Nothing go make you pass and get de score wey you need to gain admission. So anytin wey you dey do make sure say you spend enough time to prepare for ya exams.

Dem get two ways wey you fit write dis exam: paper based or internet based. If you decide to write paper based, ee go beta for you to practice with book, paper and pencil. If you wan write internet based, make you practice with computer. Dis one go give you idea of wetin de exam go be like for de day of de exam. One or two full practice test no dey enough to master de exam. And as dem talk am- ‘practice makes perfect’, you go need to practice, practice, practice!!